حاسه احساس وحش اوي ومتعب عندي حاله من الوحده مش عايزه...

Question

سألت إمرأة (تبلغ عمرها 37 سنة) 1 August, 2026

770 حاسه احساس وحش اوي ومتعب عندي حاله من الوحده مش عايزه اشوف حد ولا اصحي من النوم ماعنديش قدره اعمل حاجه في البيت لعيالي تعبت من ضغط الناس بعد ما خذلوني اقرب الناس ليا خذلوني ودمروني أهل أصحاب جيران كلهم ظلموني ظلم واضح وبين وسب وقذف واتفقوا عليا خلوني مش قادره أواجه حد ثقتي اتهزت في نفسي ومش قادره اتخطي. ولا شايفه نفسي زي زمان مع اني الناس كانت بتقول عليا مغرورة من كتر ثقتي في نفسي

أخصائي عمرو المهدي 1401 نفسي 6 اكتوبر, الجيزة · Answer 1

اظن افضل علاج ليكي. مش. العلاج من اللي فات
لان
لو متعرفش الأسباب اللي وصلتك لكدا. تتكرر المشكله كل يوم وكل ساعه
المشكله مش ف الناس. اللي حواليكي
قد ما. تكون فيكي انتي

سواء ف التعامل او. الاختيار. او التفكر اللي بتبني عليها. المواضيع
دي كلها محتاجه اعاده التكوين المعرفي. الخاص بحضرتك

مش نهايه العالم انك تغلطي
ولا تفقدي الثقه حتي

إنما المشكله الأكبر انك تبطلي تحاولي انك تبقي افضل
اتمني. تروحي. لاستشاري او أخصائي او دكتور نفسي
وبلاش. تستسلمي للشعور دا. أبدا

Answer 2

من كلام حضرتك واضح انك بتمري بضغط نفسي كبير والاعراض دي ممكن تكون مرتبطة بالاكتئاب لكن مينفعش نأكد التشخيص من خلال رسالة انصحك تزوري اخصائي نفسي او طبيب نفسي عشان يتم تقييم حالتك بشكل صحيح ولو حبيتي يشرفني اساعدك في جلسة تقييم

Answer 3

احساس الوحده صعب اكيد والظلم والخذلان أصعب خصوصا لما جت من ناس المفروض انهم امان محتاجه حضرتك تراحم ذاتي وترميم لذاتك ودعم ضروري لان الأعراض المكتوبه اقرب للاكتئاب بعد الصدمات التي مريتي بها وهذا لا يعني ان ليس لك قيمه

Answer 4

متحكميش على نفسك من أسوأ مرحلة بتمري بيها، لأنك أكيد كنتِ أقوى من اللي حصلك ولسه تقدري تقفي تاني.
ابدئي بخطوات صغيرة حتى لو مجرد تقومي من السرير أو تعملي حاجة بسيطة لنفسك ولأولادك.
ومتواجهيش كل الناس مرة واحدة، ادي لنفسك فرصة تهدأ وتتعافى الأول.
ولو الإحساس ده مستمر ومخليكي مش قادرة تعيشي يومك، متتردديش تطلبي دعم من أخصائي نفسي، لأنك تستحقي ترجعي لنفسك من جديد

دكتورة آية قدري 557 نفسي حلوان, القاهرة · Answer 5

الف سلامه عليكِ
احيانا تعرضنا للخزلان يخلينا حاسين اننا عايزين ننسحب وصورتنا تتهز قدام نفسنا و تحسي انك مش فاهمه ايه اللي حصل وليه ودماغك يتعب من كتر التفكير ولوم النفس فتقرري تعزلي نفسك
المهم دلوقت اننا نعدي المرحله دي بسلام ..انت محتاجه لدعم وفحص طبي اذا الامر مستمر لفتره عشان نطمن ان ما عندناش اكتئاب بسبب الازمه بتاعتنا وان شاء الله الطبيب النفسي يساعدك في الجلسات

Answer 6

اهلا بيكي
من وصفك دي حالة إجهاد نفسي عالي، وضغوط مستمرة وصلتك لشعور العجز وعدم القدرة على أداء مهامك الطبيعية
محتاجة تتعرضي على طبيب نفسي لتشخيصك وهل ده مجرد احتراق نفسي ولا اكتئاب
وتتابعي جلسات نفسية بعد كده مع اخصائي نفسي للشغل بعمق وتفصيل على حالتك ومشاكل
بتمنالك تكوني احسن عن قريب إن شاء الله

Answer 7

واضح إنكِ مريتي بضغوط وخذلان أثروا على حالتك النفسية وثقتك بنفسك. أحب أطمنك إن اللي بتمري بيه ممكن يتحسن مع الدعم المناسب. احكيلي من إمتى بدأت المشاعر دي، وهل أثرت على نومك وحياتك اليومية؟ عشان أقدر أساعدك بشكل أفضل.

Answer 8

متفهمه ومقدرة جداً صعوبة اللي حضرتك بتمري بيه. لكننا مش مسئولين عن توقعات الناس، مسئولين بس عن تصرفاتنا ووضع حدود صحية تحمينا من الاستغلال، واننا منديش فرصة لحد يخلينا نشوف نفسنا بعيونه.
تقبلي خوفك من المواجهة، بس متخليهوش يوقف حياتك.
وحددي مصادر ثقتك بناءً على دلايل عشان تقللي احتمالية الخذلان.
والأهم من كل ده ان اللي حضرتك بتوصفيه أعراض محتاجة علاج نفسي.
لما تتحسني وتكوني مبسوطة؛ إنتاجيتك وثقتك في نفسك هترجع، وهتلاقي ولادك مبسوطين أكتر.

Answer 9

يمكن يكون اللي بتمري بيه أكثر من مجرد إحساس عابر، وقد يكون مرتبطًا بضغوط نفسية أو أعراض اكتئاب تحتاج لتقييم. أنصحك بعدم الاستسلام لهذه الحالة، وحجز جلسة في العيادة لنتفهم الأسباب ونضع خطة مناسبة تساعدك على استعادة نشاطك تدريجيًا.

Answer 10

مقدرين مشاعرك وألمك
واضح انك تعرضتي لمواقف مؤلمة أو ضاغطة الفترة اللي فاتت وده نتج عنه رغبة قوية في الانعزال
كما ادي لاعراض تشبه اعراض الاكتئاب و دي بنسميها الاحتراق النفسي
اعتقد انك محتاجة مساعدة من متخصص الفترة الحالية دي

Answer 11

اولا الف سلامة عليكى اكيد حاسة بيكى ومقدرة شعورك لكن الشعور بعدم الشغف والعزلة وساعات النوم الطويلة إذا زادت عن 14يوم بيكون دخول فى اكتئاب فلا تستسلمى لهذه الأعراض...انت بحاجة للمساعدة

Answer 12

يفضل تيجي العياده
لان عشان اقدر احدد الأعراض دي سبابها اي لازم اعرف اي المواقف والتجارب الحياتية ال مريتي بيها

Answer 13

وبما إن الإحساس وصل لدرجة إنك مش عايزة تصحي من النوم، محتاجة أسألك سؤالًا مباشرًا جدًا، ومش هاحكم عليكي إطلاقًا:
هل وصل بيكي التعب إنك تفكري إنك تنتحري أو تؤذي نفسك او تأذي حد من اللي حواليكي

Answer 14

دي لو بقالها اكتر من اسبوعين تبقا اعراض اكتئاب ومحتاجة تشخيص وتقيم في اسرع وقت حتي لا تتفاقم

Answer 15

مساء الخير
متفهمة مشاعرك قد ايه صعبه والتجربة نفسها صعبة عشان كده محتاج تتكلم مع متخصص يساعدك انه تشوف افكارك ومشاعرك بعد اللي حصل بقوا عاملين ازاي وتبدأوا تعالجوا اثر اللي حصل و ان شاء الله ترجعي احسن من الاول

Answer 16

اهلاً بيك
متفهمة مشاعرك و معاناتك ، مهم نقيم المشكلة و تدرب علي ازىي تتعامل مع مشاعرك الناتجة عن مواقف الظلم التي تعرضت لها و تستعيد ثقتك بنفسك و الخروج من معاناتك بشكل صحي .

Answer 17

علشان ترجعي الدافعيه للحياه وللطاقه الإيجابية وعودة الشغف لازم تواجهي نفسك وتفرغي مافي عقلك اللاوعي علي الورق هتظهر اسباب المشكله

Answer 18

مهم جدا معرفه الفترة الزمنية لهذة الاعراض واذا ما كان هناك سبب مباشر لظهورها
و هل توجد اعراض اخري
لذا يفضل التوجه لمختص لدراسة الحالة والتشخيص الاكلينيكي المناسب

Answer 19

اهلا وسهلا بحضرتك انا متفهمه مشاعرك جدا
اهم حاجه في المرحلة ديه انك بلاش تفسري الانسحاب انه ضعف بالعكس انت انسانه قوية وبطله انك تحملتي المواقف ديه كلها
الفكرة انك تأذيتي وطبيعي انك محتاجه وقت عشان تستعيدي قوتك بالتدريج وده ابسط حقوقك
حاولي تعملي اهم حاجات في يومك ولاولادك اللي بيحبوكي اللي تقدري عليه بدون ما تلومي نفسك وكلمي ولو شخص واحد بترتاحي معاه
ثقتك بنفسك موجوده وهتستعيدها ان شاءالله الفكرة ان احساسك بالثقة و بالامان اتهز .